® الشريف بدر قال لي لو إستشهدت الحور العين راجياك ، قلت ليهو خلوني لي بنات ديم النور ديل 😂
® كُنت ملك الطيور وهسه حتى الطير رحل خلاني .
® إسم الإصلاح ماعاجبني وجمال كلية ماف زيو .
® رسالتي لرمزي : حطمتو الكورة .
® بكيت لمن الهلال أدانا 14 وهذا سبب إنشقاق الإصلاح من الأهلي .
مدخل :
لكل بلد ظرفائها وبلادنا تذخر بعدد وافر منهم على مر السنين ، لايخلو أي حي من أحدهم أو أكثر ، يمتازون بسرعة البديهة والوعي المتقدم ورُوح النكتة ورشاقة التعبير والحس الفكاهي ، وقفشاتهم وتعليقاتهم ترمومتر لحالة البلاد والوضع العام ، نستضيف اليوم روح ديم النور وفاكهتها وعاشق الإصلاح دامبسا / ملك الطيور .
قدم نفسك دون ألقاب في سطر واحد ؟
محمد عثمان تورو ( دامبسا ) .
سر اللقب دامبسا / ماك الطيور ؟
لقب دامبسا بسبب صديق من دولة أثيوبيا ، أما ملك الطيور فلأني كنت ومازلت عاشق ل ( شرك وإصطياد الطيور ) خاصة في دلسه .
لسه بتشرك للطيور يا دامبا ؟
تبدو على مُحياه إبتسامة حزينة ، يقول : هسه حتى الطير رحل خلاني .
اختر إسماً من قائمة أسماء في هاتفك ووجه له الدعوة لمشاركتك إفطار رمضان؟
ملك ديم النور جمال كلية ، شاب جميل ، بشوش ، مهذب ، خدوم ، مامقصر مع أي زول ، تجدو في المقابر وفي الأعراس ، كل أحياء القضارف تشهد له .
إسحب ورقة من أجندتك واكتب عليها رسالة حدد فيها إسم المرسل إليه وفحوى الرسالة؟
رسالتي للمحامي رمزي يحى ، أقول ليهو ، الرياضة في البلد دي إنتهت ، ألحقونا الحقونا قوّام ، لا مستوى إداري لافني ، منتهين عديل .
أخطر مباريات الإصلاح كانت مع منو ؟
إيييييييك ، زمان مبارياتنا مع إشراقة كانت حكاية ، العجلات ماتديك الدرب ، نمش الإستاد العميان شايل المكسر ، كانت أجمل اللقاءات .
من هو الشخص الذي تتذكره دائماً ؟
فيصل عوض حسن الشهير ( فيصل الجمل ) ، كان بمتعنا في الكورة وماممكن أنساهو .
قلت لي إسم الإصلاح ماعاجبك ، ليه ؟
لأنو جاي من الإصلاحية ، شوف ، الفريق دا أصلاً مفروض يكون إسمو ديم النور ، زمان أي ولد صغير أبى المدرسة يخوفوهو يقولوا ليهو نوديك الإصلاحية ياتبقى نجار ، ياحداد ، وعشان يخوفوا الأولاد ديل قالوا يسموهو الإصلاح ، أها عملوا تصويت بين ديم النور والإصلاح وإختارو إسم الإصلاح .
في سوق الأسهم هل أنت دائن أم مدان؟
أصدقائي مكرمني غاية الكرم .
من تتوقع أن يفوز ببطولة دوري القضارف ؟
المستوى متذبذب ، مابتقدر تحكم من هسه ، الأكاديمية ماشة كويس وأديها نسبة 55% ، أيضاً الهلال والمريخ والسهم .
لاعبين مميزين لن تنساهم ؟
زكي حنا ، حسن جبريل ، فيصل الجمل ، كانوا مبدعين وفنانين بمعنى الكلمة .
إلى من تعتذر وما هي أسباب الإعتذار؟
إتغالطت مع المدرب شلش في لاعب من الإصلاح إسمو حسن جبريل ولاعب تاني إسمو أبوطيارة ، قلت ليهو طيارة ما لعب سوا مع حسن جبريل ، شلش قال لي لعب ، قلت ليهو مالعب ، المهم إتغالطنا وبي سبب الغلاط دا شلش لي هسه زعلان مني وقاطعني رغم إنو كان صديقي شديد ، أنا مازعلان منو هسه لكن بعتذر ليهو رغم إنو حسن جبريل برضو مالعب مع أبو طيارة .
ما هي رسالتك لإدارة ناديك الإصلاح ؟
أقول ليهم : أمشوا يلا ، أمشوا يلا ، ماعندهم شئ .
سمِّ لنا ناديا آخر تشجعه بعد ناديك المفضل؟
لالالالالالالالالا حبيبي الإصلاح بسس .
مابتقبل الهزيمة من ياتو فريق ؟
الأهلي طبعاً ، يغلبنا أي فريق إلا الأهلي ، رغم إنو
والدنا كان من مؤسسي نادي الأهلي ، لكن حبوبتنا جبدتنا للإصلاح زينب فرج المليجي (أم زومو) كانت الداية الوحيدة في الحي هي وبتول بت الشفيع وبتول بت حماية أدتنا قطعة كاملة للإصلاح ، الله يرحمهم جميعاً .
هزيمنا لاتنساها ؟
السهم مرة أدانا 7 ، بعد الكورة إنتهت لميت في إتنين من اللعيبة ودقيتهم دق العيش .
السر الميجر ؟
السر ظريف المدينة ، رياضي مامتعصب ، زول حلو
ويدو واصلة ، زول نكتة حاضرة .
مواقفك معاهو شنو؟
بالمناسبة السر كلامو صاح في القصيدة الكتبها ديك حقتو ديك ، ومواقفي معاهو كتيرة شديد ، بس داير اقول ليهو أنا مادفقت العشاء يا السر .
موقف طريف ؟
الحارس عزام مرة إتعوق في كورة ، ومشى الدكتور
أداهو مرهم وقال ليهو تمسحها محل الضربة ، قام مشى الإستاد النهار ودخل خط 18 ومسح المرهم في المكان الأنضرب فيها ، التحية لحبيبنا لعزام ورمضان كريم .
إداري من الجيل الحالي بيذكرك بإداريين زمان ؟
ماف ماف ، ناس زمان مابيتحصلو ، كورة زمان كانت بـ (السيرك ) يبلغوك الزمن والتفاصيل ، هسه بالتلفون ولمن ينسوا يقول ليك الشبكة كعبة ولقينا تلفونك قافل .
ماذا تطلب من هؤلاء :
إتحاد الكرة :
حطمتوا الرياضة يارمزي رغم إنك راجل فاهم ، ماعندكم فهم بتاع إدارة بي مثقال ذرة ، أرجوكم أمشوا يلا .
لجنة الحكام :
كلهم أصدقائي ، وأنا ماحصل أسئت حكم أو شتمتو ، وأنا عندي ليهم مقولة ( مابقدر أقولا هنا ، مابتنكتب ) المهم أنا أطلب منهم تحكيم بأقل بأخطاء ممكنة .
هل تدخل المطبخ ؟
كييييف ، أنا أبو المطبخ والله أظبط ليك أم رقيقة
لا عليها سلم لاعليها كديب هههههه أم رقيقة بي الجوانية أو المخروقة ( ويكها من أمها ) ، وعندك حلة طيور ، بعمل
ليك من الطيور زغني وشية .
زول تعزمو حلة طير ؟
فاروق أبو سن ، أنا عازمك حلة طير زي زمااااان ، الله
يديك العافية يا فاروق .
من أول شخص تهاتفه أو تلجأ له إذا شعرت بالضيق؟
محمد عوض باشري صديقي الجميل .
ما لا نعرفه عنك؟
ماف حاجة مدسوسة ، أي زول بيعرفني وأنا كتاب
مفتوح .
موقفك مع والي القضارف الاسبق الشريف بدر ؟
ساقونا مرة وقالوا لينا تمشوا طلائع الجهاد وتدربو عشان تمشوا الجنوب وتجاهدوا في سبيل الله ، أها الوالي السمح الشريف بدر قعد يتكلم معانا ويقول : شدو حيلكم انت ماشين تجاهدوا ولو إستشهدتوا حتمشوا الجنة وتعرسوا الحور العين ، كوركت ليهو ، يازول أنا خليني مع بنات ديم النور ديل أحلى منهم ماف ، مالي ومال جهاد وحرب .
الشرطة والأهلي ؟
الشرطة قالوا سجلت كويس ، سمعت في برنامج عالم الرياضة ، والأهلي برضو ماش كويس ، نحن بنشجع الأهلي في الوسيط ونقيف معاهو ونتمناهو يمش الممتاز ، لكن في المحلي الأهلي عدونا الأول .
تصرفات تزعجك ؟
الحاجة الوحيدة البتضايقني لمن يقولو لي الإصلاح
إتغلب ، ماكنا بننوم لمن نتغلب ، خاصة غُلب الأهلي والسهم .
سبب إنشقاق الإصلاح من الأهلي ؟
عمنا الله يرحمو عبدالكريم آدم وعبد الله لونقي ، قالوا أولادنا ديل لمن يجو ماقاعدين يمرنوهم ، ليه مانعمل لينا تيم برانا ؟ وطوالي عملوا الإصلاح ، بس دي كل الحكاية .
آخر مرة بكيت فيها متين؟
لمن الهلال أدانا 14 ، يضحك ويقول :
وإحتفلت بي قمر 14
لايكتمل رمضان إلا ب ……؟
لمة الأهل والأصحاب .
من يقرأ أفكارك؟
ود الشيخ شاطر في قراءة أفكاري .
صديق لاتمل مجالسته ؟
أحب مجالسة جميع أصدقائي خاصة حامد إبراهيم
الممرض بتاعي .
موعد لا تتأخر عنه ؟
زمان كان المقابر ، والعيان في المستشفى أو البيت ، لو دايرين مني دم مابتأخر .
شخص لاترفض له طلب ؟
الوالدة العزيزة .
شخصية إلتقيتها وتشرفت بها؟
تشرفت بلقائك أنت أخي محمد يعقوب ، وأتمنى إنك تواصل في لقاءاتك مع العجائز الزينا ديل ، ولازم توصل صوتي لي ناس رمزي ، قول ليهم الرياضة دي مابناطلين وقمصان سمحة ، الكورة إدارة وعمل .
كلمة أخيرة .
شكراً ليكم ناس حال الكورة ، وأتمنى ماف زول يزعل مني في الحوار دا ، العفو والعافية ، الدنيا رمضان ، عليكم الله ماف زول يزعل مني.
